Meðferðir

Ef einstaklingur eða par hefur reynt að eignast barn í eitt ár eða lengur án þess að þungun hafi orðið, telst það ófrjósemi. Talið er að um einn af hverjum sex upplifi slíkan vanda á einhverjum tímapunkti á ævinni.

Orsakir ófrjósemi geta legið hjá konunni, karlinum, báðum aðilum eða verið óútskýrðar. Einnig getur þörf fyrir frjósemismeðferð tengst félagslegum aðstæðum og fjölbreyttum fjölskyldumynstrum.

Algengar orsakir ófrjósemi hjá konum

Lokaðir eða skemmdir eggjaleiðarar
Legslímuflakk (endómetríósa)
Truflanir á egglosi
Minnkaður eggjastokkaforði
Hormónatruflanir

Algengar orsakir ófrjósemi hjá körlum

Fáar sáðfrumur í sæðisvökva
Skert hreyfigeta sáðfrumna
Lokaðar sáðrásir
Hormónatruflanir
Ónæmisfræðilegir þættir, svo sem mótefni gegn eigin sáðfrumum

Aldur hefur veruleg áhrif á frjósemi, bæði hjá konum og körlum. Einnig geta lífsstílsþættir eins og yfirvigt, undirvigt, reykingar, áfengisneysla og langvarandi streita haft áhrif á möguleika til getnaðar.

Í sumum tilfellum finnst engin skýr skýring á ófrjósemi þrátt fyrir ítarlegar rannsóknir. Þá er talað um óútskýrða ófrjósemi.

Hjá Livio leggjum við áherslu á að greina undirliggjandi orsakir og bjóða upp á einstaklingsmiðaða meðferð sem tekur mið af þörfum, aðstæðum og markmiðum hvers og eins.

Bókaðu tíma hjá einum af sérfræðilæknum okkar í gegnum Noona, með tölvupósti á reykjavik@livio.is eða í síma 430-4000.

Sérfræðilæknar Livio

Snorri Einarsson er sérfræðingur í fæðinga- og kvensjúkdómalækningum og hefur starfað við ófrjósemislækningar frá árinu 2006. Hann hlaut viðurkenningu í ófrjósemislækningum sem undirsérgrein árið 2012, lauk doktorsprófi 2021 og er jafnframt kennari við læknadeild Háskóla Íslands.

Tinna Baldvinsdóttir er sérfræðingur í fæðinga- og kvensjúkdómalækningum. Hún lauk sérnámi við Sahlgrenska háskólasjúkrahúsið í Gautaborg og varð sérfræðingur árið 2016. Eftir það hefur hún sérhæft sig í sónarskoðun og fósturgreiningu samhliða störfum sínum við fæðinga- og kvensjúkdómalækningar.

Þorbjörn Have Jónsson er sérfræðingur í fæðinga- og kvensjúkdómalækningum með greiningu og meðferð frjósemisvandamála sem sitt aðalstarfssvið.